بسم الله والصلاة والسلام على رسول الله وءاله وصحبه
٭-----٭
المسؤولية
٭-----٭
عييت مانقلب بين السطور
ولا لقيت عذر لهاذ المقهور
اعذرني نعذرك را هذا غرور
وجدت ولا واحد فينا معذور
أنا بغيت نكون ديما معذور
لكن عذروني بالحق لا بالزور
طويل أو قصير ما معذور
لبيض ولسود ما معذور
الرزين والنزق ما معذور
العاقل والأحمق ما معذور
القوي، الضعيف ما معذور
المعافى، المريض ما معذور
التحتاني، الفوقاني ما معذور
الغني، حتى الفقير ما معذور
حتى حد وااا لعباد ما معذور
واك واك بغيت نكون معذور
الساكت، الناطق ما معذور
النايم، زد، الفايق ما معذور
الخراز، الدراز، الخباز والحراز
ما فيهم شي واحد معذور
النجار، الخضار، العطار، الگزار،
الحرار، الجيار، الفخار،
السمسار الحضار والنفار
فينا هو فيهم المعذور
الشراط، الخياط، الغياط، واللباط
عذروا إلا كان فيهم معذور
المراي، القلاي، البناي، الشواي
زيد الحجام واللحام
وهارا الغسال، الفوال، البقال،
الزبال، الدلال، الطبال، النقال والكسال
ضيف السفناج والسراج
مع الصطايلي، الغرابلي
والدباغ، الصباغ، الصايغ
وگول الرفاع، الرباع
والزلايجي، القهواجي،
التعارجي، الدجايجي
عاد الزواق، الدقاق، السياق
الحداد، الجلاد، اللباد والحصاد
الصبان، الطحان، اللبان
لمضامي، اصطارمي، لقايمي
العساس، الگلاس، الخماس
الفرناطشي، الكوادشي
حتى الروابزي ما معذور
لقزادري، النواعري، الحصايري،
الشكايري، لقزابري، لگنابري
لحراري وتگول ش واحد معذور
الكيماخ، الملاخ كلشي عليه الدور
الصنادقي، الرقايقي، الحلايقي
الگراب، الگصاب، الحطاب،
البواب، الشطاب، السراب.
لقشاشبي، الزرايبي
واش الخرارفي؟ لا ما معذور
الزواتني، لقفاطني،
الجصاص،الگباص
اللواح، الكواح
الجرايدي، البياض السوايكي،
الوظاف، حتى حد ما معذور
مع كل مسؤول وموظف ومستخدم
عالله يكون فينا شي دم
نوفي الكيل ونتركو الزور
نعاونو حتى بالقليل ونرفدو بالمبتور
حتى ما يبقى بيننا محگور ولا معگور.
٭-----٭
كلكم راع وكلكم مسؤول عن رعيته
٭-----٭
محمد الحسني بطي
ليست هناك تعليقات:
إرسال تعليق