(ليه يا وجع)
ليه الوجع ساكن
قلوب التعبانين
والليل بلون داكن
حتي النهار هالل حزين
شايف آلام لكن
بيحلف ميت يمين
إن الدموع جفت
وحفرت ع الجبين
كتبت حروف شفت
علي وشوش الشقيانين
والضحكه جات شقت
معدومة في الزمن اللعين
رجع النهار يشكي
ويحكي قصته
بس إللي يسمع مين
قام داري صوته ولهفته
دق علي وتر الوجع
علي نغم لحنه الحزين
سمعت حواسه اللحن
نزفت دموع كل العيون
وبصوت أنين
وبكت قلوب التعبانين
ولحد فين
رايح يا حلم الموجعين
لساك بتسأل هما مين
إللي بيتمنو الفرح
عايشين في عدد الميتين
تظلم في كل إللي إنجرح
تنصف في قلب الظالمين
ليه يا وجع طبعك أنين
ولو شاكينا نشكي مين
(عبده النجار)
ليست هناك تعليقات:
إرسال تعليق