حكايات زجال
قالوا عني كثير حجات
وقالوا بَطَل غزليات
ارجع رُد روح البنات
واقفلن عالطرقات
شغل هالموبايلات
وابعتلُن مسجات
ولا تنسى انه المكالمات
أهم م الكبسولات
مكالمتك ترضيهم
وتنسيهم الماضي اللي فات
البنات بفكرو فيك
وما درسوا للامتحانات
قلتلهم مابتلزمني هالحركات
ولا تلزمني هيك نهفات
شو بدي بالبنات
لما أوقف عالطرقات
كل واحد عنده أخوات
بخاف عليهم للممات
وأنا ما بكتب غزليات
لأنه عندي قضيات
قضية الأسرى بالمعتقلات
وقضية المخيمات
غزة والضفة والشتات
كلهم محاصرات
أنا ما راح اكتب غزليات
لترجع المقدسات
ويرجع حقنا كامل
وترجع لينا سيادات
قالوا تفكيرك قديم
واللي بفكرك زمانُه مات
روح غير هالعادات
شو بدك أحلى من البنات
ما بتتذكر بالزمانات
لما وصفوك بشهادات
ورفعوا لك شعارات كلها
حب رومانسيات
قلتلهم ياجماعة
الطاعة لـ الله الطاعة
لا تعلقوا الحب بشماعة
أنا عندي قناعة
لما ينادولي البنات
لا سمع ولا طاعة
ولما ترن الساعة
بقول ياربي شفاعة
شو نفع الحب والحنية
لما تكون بالأمة مجاعة
شوفوا الناس اللي بتموت
أخبارهم ع الإذاعة
وأنا من حزني عليهم
ضاق قلبي بأوجاعه
قالولي يابني لا تنظر تحتك
انظر لسماك
ولا ترد عالسائل
اللي واقف على بابك ترجاك
لا تعطيه فلوسك
لأنه راح تخرب بِناك
تمسك بفلوسك
وحياتك ما بنساك
سيبك من عاداتك
ورح استنشق هواك
قلت لهم يا جماعة
ما رح خلي السائل يترجاني
راح أعطيه حبي وحناني
وأعطيه مما الله أعطاني
وما راح كون على نفسي جاني
و إلا الله بيمحاني
لأني عبد فقير والله هو الغني
السائل ابنك وأخوك
وبالزجل لا تتحداني
ياما زجالين تحدوك
ومافي زجال تحداني
كل الزجلين غلبوك
وأنا شافوا إحساني
بقلمي/ عطالله دلول
ليست هناك تعليقات:
إرسال تعليق