سألت كتير عن الحياة.
ناس قا لت الحياة دور و رسالة.
و ناس قالت الحياة كورة مكارة
و ناس قالت الحياة نكتة منقالة.
و ناس قالت الحياة طفلة ممسكينها زمارة.
يمكن صحيح الحياة دور و رسالة.
أصل كل واحد زى ما جاها فى يوم.
هيرحل عنها برضه فى يوم.
و هيبقى ذكرى منشالة.
واحد ساب فيها علم.
و واحدة سابت فيها فن.
و واحد ساب فيها ابنة.
و واحدة سابت فيها ابن.
و واحدة سابت فيها للناس حلم.
و واحد ساب فيها للناس غم.
و واحد ساب فيها للناس فرح
و واحدة سابتلهم هم ما يتلم.
يا ترى يبقوا كلهم كدة متساويين.
و لا فيهم اللى كان له فيها دور و رسالة.
و يمكن صحيح برضه
ان الحياة كورة مكارة.
ياما ناس وصلت
و لا شقيت و لا تعبت.
و يقولك
أصل قيراط حظ و لا فدان شطارة.
و ناس شقيت و تعبت
و سافرت و رجعت.
وعمرها حتى ما جابت شقة فى حارة.
و يقولك أعمل أكتر من كده ايه يا عمى
ده الحياة بغزالة
و فيه.ناس مقتنعين ان الحياة نكتة.
يقولك ماشى لوحدك ليه
فى سكة الجد
فى سكة غير السكة.
يا اخى ما كل الناس اهم
مقضيينها هلس
و لا انت يعنى اللى هتعمل فيها فونتة.
و أخرتها ايه يعنى
مترين فى عرض شبرين
فى أى حتة.
لكن معقول تكون الحياة
طفلة مسكوها زمارة.
طب ما حقيقى
أوقات الحياة بتدى من غير سبب.
و أوقات بتاخد من غير سبب .
طب عينى فى عينكم كدة
و اللى فاهمها منكم يدينى أمارة.
طب بتدى ايه و بتاخد ايه
تكون بتدى شطارة.
بس ده لما بتاخد
بتاخد فلوس و بنين.
تاخد أوقات الفرح
و تدى بدالها أنين
و ياما ناس كانت تحت بقت فوق.
و ياما ناس كانت فوق بقت تحت.
ما هيا كدة الدنيا دوارة.
لكن هيا دى الحياة يا صاحبى
لو حاولت تفهمها.
لا هتفهمها و لا هتعيشها.
و مش هينوبك منها حاجة.
غير تربة فخمة
تلحق و تفرشها.
انما لو كان ليك فيها دور و رسالة.
هتفضل كلمتك فى الدنيا عمالة.
و هتفضل ذكراك فى الحياة منشالة.
و هييجى يوم.تقابل
اللى اداك روحك و أحياها.
و هيجى يوم تفهم
ان ربنا لأنه بيحب الحياة اداها.
و لانه بيحبنا
خلا فرحنا و أملنا فيه
مش منها و لا فيها و لا وياها.
الشاعر العجوز
مرقص اقلاديوس
ليست هناك تعليقات:
إرسال تعليق