المخدوع ( أشعار : كرم محمد )
انا المخدوع
عايش موجوع
و عنيه كلها دموع
شايف حلمى
غايب عنى
و ماشى فى سكه
ما ليها رجوع
انا الى وسط خلانى
عايش مع جرحى
و أحزانى
انا المخدوع
عايش موجوع
و عنيه كلها دموع
ببكى على عمر ضاع منى
و أنا فى الغربة مستنى
أرجع منها بأحلامى
و أعيش باقى أيامى
أتارينى فى بحر ملوش أخر
بعوم فيه و بعافر
مش لاقى شط أرجع له
أو غيره حتى أوصل له
أنا المخدوع
عايش موجوع
و عنيه كلها دموع
انا الى الفرحة خاصمتنى
حتى البسمة نسيتنى
حقول و احكى و اشكى لمين
و كل الى جنبى شايفه حزين
و أدى حال إلى فى الغربة
ملوش صاحب غير الكربة
و لو فكرت تتصاحب
حتلاقى الحزن ليك صاحب
أنا المخدوع
عايش موجوع
و عنيه كلها دموع
نهارى ليل ملوش أخر
شايف حلمى بِيِتاخر
مش قادرة إيديه توصله
و لا قادر حتى أكون زيه
و شايف العمر بيعدى
و الصحة كمان بتهدى
و شايف محطتى بتقرب
و من النهاية مفيش مهرب
أنا المخدوع
عايش موجوع
و عنيه كلها دموع
# المخدوع
# أشعار : كرم محمد
ليست هناك تعليقات:
إرسال تعليق