هى الحزن لما بيفرح
هى الزرع لما بيطرح
هى الشمس لما عالكون بتصبح
هى اللى بحبها ميه فى الميه
-----
ايام وليالى وسنين
واحنا سوى عايشين
عالحلوه والمره متعهدين
واللى بينا اسرار حربيه
-------
هى اللى شفت معاها اللى ما يتشاف
هى الامان لما بيخاف
هى الملمس الناعم الشفاف
هى الطيبه والرقه والحنيه
-----
هى الليل لما بيخاف م الضلمه
هى الهشه الضعيفه الجامده
هى الكون الفاضى فى وسط الزحمه
هى الرقيقه الهاديه المجنونه الشقيه
-------
هى قبرى اللى مسكنتوش
هى قدرى اللى مخترتوش
هى عمرى اللى معشتوش
هى احلى مسأله شخصيه
------
هى الذكرى هى امبارح
هى الوقتى هى زرعى الطارح
هى بكره وانا معاها مجروح او جارح
دى مسأله منتهيه
------
هى الشمس الطيبه وقت الصبحيه
هى الشمس القويه وقت الضهريه
هى الشمس الحنينه وقت العصريه
هى الشمس الحلوه وقت المغربيه
------
هى لوحه مفيهاش الوان
هى الف مليون مكان
هى فراشه بتدور عالاغصان
هى اجمل لحن واحسن اغنيه
-------
هى جانا الهوى للعندليب
هى القميص الموف للحبيب
هى اللى شمسها عن عمرى ما غابت ولا هتغيب
هى حب السنين اللى فاتت وعشق السنين اللى جايه
-----------
----------
مسأله شخصيه
الجزء الأول
ليست هناك تعليقات:
إرسال تعليق