عاجل جدا=====
مغاوري كروش
==========
لو بعصايتك
تضرب عرض البحر
تشق طريق
وتشق ميدان
لوحتخللي بإذن الله
الميت ينفض نفسه
يفقس م الاكفان
واللا تمس عيون الاكمه
يجري النور ف عنيه
شريان
أو يتنزل فوقك
وحي يفك طلاسم
مكر الله يشفيهم
م الهذيان
مهما حاتعمل حاوي
ياعارف
مش حاتآمن بيك الغوله
ولا حتسلم
ولا حاتحول ذاتها
لذات انسان
بس انا عارف
انك عارف
زي ماعرفت كل الناس
وان كلامي المرسل
ما بيحصلشي
وانه محال يتكرر
زي زمان
لكن ممكن
ممكن ليه
لما يكون المعني
ف مخ العارف
بذره اتغرست
تطرح ميت بستان
يعني الدنيا معاك تتجمل
تبقي ربيع
يعني الورد يفتح
يعني العاصي لربه
واهله يطيع
لكن لما خريفك
يفرش وجع الشوك ف المعني
تلقي الناس تتوجع
او بتضيع
لما خريفك
يدبل فيه الورد وريحته
يبقي خريفك ايه
يبقي خريفك
ناوي يبيعك
اما ربيعك
عمره مافكر مره يبيع
سيدنا العارف
كل المعني ف مخك
واحد
عمرك واحد
مابيقبلش القسمه
او التقطيع
طيب
ليه الواحد يبقي اتنين
نص يفادي
نص يعادي
طبطب فوق الكتف ودادي
يمكن لما تطبطب
تقلع عين الغوله ..وتضرب
ايد الكره
وتكسر مش راح تخسر
لو حاتطبطب
اظبط ساعتك
قبل قبل السوق مايفوتك
واللا يشطب
الحق وقتك
قبل الغوله ماتصحي
وتقلب سقف المعبد
يبقي البايع
واللا الشاري
جوه السوق
حايكون خسران
==========
الشاعر/مغاوري كروش
ليست هناك تعليقات:
إرسال تعليق