قصيده
الانكسار في العسل
؛؛؛؛؛؛؛؛؛؛؛؛؛؛؛؛؛؛؛؛؛؛:؛؛؛؛؛؛؛؛؛
وسعي السكه للونك
ياعتمه ياللي بتجدلي
حبال السكون
ضفري خيوط الصباح
اللي انفرد جوه البزوغ
كرمشي عروف الديوك
اللي استطالت للادان
عوقي الفجر اللي نابت
واسبلي فوقه الجفون
ودا مش جنون
دا الليل ف عز المعمعه
سهران بيسمع للغريب
اللي التقاه جواه غريق
الليل بينحت في
تضاريس الغصون
وعنيه بتفحص
في تفاصيل الغريب
اللي انغسل
وشه بعنيه
وحصانه راكن منكسر
والطل بيخيم عليه
الليل
ف شرد المعمعه
سهران بيسمع م الغريب
حدوتة البنت
اللي ضاع منها الطريق
والحسن فيها بيستحي
لما انزرع فوق الخدود
حدوتة البنت اللي ضلت
لما طلتع البراري
وانهزم قدام جمالها
جني ضاري
ادعي انه خلاص
صار م الملايكه
ومستحيل انه يعود
وانحني يعلن قبوله
بالسجود
واهو خدها خلسه
ابن الابالسه
عدا بيها وانتهك كل الحدود
وف بلاد الجن راحت
زوقوها
بس ايدها
كلبشوا فيها القيود
قول ياصاحبي
قول معايا
ليه كفورنا اللي احنا فيها
واللي منها البنت تاهت
لسه عايشه بتستجم
فاكره ان الجن ده
ملهوش وجود
فاكره ان الانكسار
جواه عسل ملهوش قرار
باختصار
ليه كفورنا اللي احنا فيها
رافضه ان الانكسار
معناه قيود
معناه
نهايه واحتضار
واما قلت ف يوم
نصيحتي
كدبوني
خرجوني م الديار
بقلمي/مغاوري كروش
ليست هناك تعليقات:
إرسال تعليق