لو ف بالك
********
مغاوري كروش
*******
ياللي كنت ف يوم
حبيبك
لو ف بالك
نيه تيجي
وتقتليني
اقتليني
حتي لو برصاص جنونك
او مشاعري تعلقيها
في المشانق
وابقي فرجه
للخلايق
اقتليني
لو بضربة سيف
تبعتر شمل نفسي
في المغارب
والمشارق
صدقيني
لو قتلتي
صدقيني
مش حاحس
اني اتقتلت
اصل حبك
طير معشش
جوه روحي
مش في جسم
يشيل جروحي
الا مره
في صبح بدري
والحنين
مخنوق ف صدري
ابتديت
اعرف واحس
اني اتقتلت
بس قتلي
كان مرارة طعم قولك
لما بعتي
لما قولتي
ان انا مش ليك
ولاانت
تبقي ليه
فانكسرت
اللحظه ديه
انكسرت ف عزي بيكي
وابتديت
اعرف حقيقي
ان فيكي جوه جوه
ياللي كنت في يوم
حبيبك
اتقتلت بكل قوه
************
ليست هناك تعليقات:
إرسال تعليق