💟 لمصر اكتب و اكتب 💟
باقول الشعر فى غرامك
و بامشى السكة ادامك
و راضى بكونى خدامك
لكن نفسى تبصيلى
باحبك من وانا عيل
و ياما عشت اتخيل
بإن الكون دا بيميل
و يعدل لما تناديلى
و لما كبرت حسيتك
بكل ما فيا حبيتك
ما جاتش اللحظة و نسيتك
و شديتلك اوى حيلى
فردت دراعى ابنيكى
و لسه بدمى بارويكى
و اشوفنى ضحكة فى عنيكى
و باستناكى تحكيلى
نضح عرقى على ترابك
ينام قلبى و يصحابك
و روحى واقفة على بابك
تنور بيكى قنديلى
و اصب دموعى انا فى كاسك
و عاشق عطر انفاسك
فى محرابك انا ناسك
باصليلك ... فصليلى
بتنسينى .. و انا فاكرك
و تقسى عليا .. و انا شكرك
و عشقك للى عاش ناكرك
و انا عن عشقى بتميلى
بتدى لقمتى ... لغيرى
و قافلة لى طريق سيرى
معندانى فى تفكيرى
و دايما رافضة تأويلى
مع انى باصون عرضك
و بازرع بالامل ارضك
و احافظ ديما على فرضك
و يحلا فيا ترتيلك
عشان خاطرى بقى .. فوقى
و كونى الشمس فى شروقى
ساعتها هاروق و هتروقى
و هاحكيلك ... و تحكيلى
يا مصر يا حتة جوايا
انا عشمان فى ضحكاية
اصالح بيها دنيايا
و اغنى بها مواويلى
دا انا ابنك .. ما تحرمنيش
سيبينى مرة بيكى اعيش
ما هو انتى لو ما حبيتنيش
قوليلى ازاى هتحليلي
ليست هناك تعليقات:
إرسال تعليق