دقايق
( مهمناش )
----
كنت حاسس
انى هشوفها
شفتها
كنت حاسس
انى هكلمها
كلمتها
---
سلمت عليها
لمست ايديا ايديها
---
مهمناش
ألف عين شيفانا
مهمناش
كل الظروف اللى بتتحدانا
---
شوقنا غلبنا
ونسينا نفسنا
ما احنا من زمان اوى
بنحب بعضنا
---
لسه ذى ما هى
بنت الايه
كل حاجه فيها شقيه
واكتر من كدا فيه
---
اول مره
نضحك بصوت عالى
فى الشارع
وقفت معاها
دقايق
نستنى كل المواجع
---
ومشيت
ومعرفش هشوفها تانى اذاى
حب عمرى اللى فات
وكل عمرى اللى جاى
---
ألف ناى بيغنى
على موالى الحزين
ألف شمعه بتبكى
بدل الدمعه ملايين
---
ألف نار بتحرق كيانى
لحد امته هفضل وحدانى
---
تعبت
من كتر ما شربت
من كاس غيابها
نمت
لقيتنى فى حلمى هربت
وواقف بخبط على بابها
---
افتحى
دا مطرحى
افتحى
عنفينى واجرحى
افتحى
ولو عايزه تدبحينى
ادبحى
---
فتحت
وخدتنى فى حضنها
وغرقت اكتافى من دمعها
---
فتحت
وقالتلى امشى با مجنون
قلتلها هفضل واقف
واللى يكون يكون
---
مفتحتش
وسابتنى واقف
فى المطر والبرد
شكلى يصعب
على اى حد
---
مفتحتش
وهتفتح ليه
ما هى نايمه جنبى
مروحتش
-----
-----
دقايق
( مهمناش )
الاحد
1 / 10 / 2017
الزعيم
ليست هناك تعليقات:
إرسال تعليق