رؤيه
لوان بعيون البصيره والبصر
كنت ارصدك وسط الفضا
متفضضه
متسنتره فوق الوشوش
متسخره كوكب
على درجة قمر
لوان بعيونى اشوفك
فى المدار ..تتنفسى
تاخدى الشهيق
فاتفتتى
جبل الرواسب والخبث
يطلع زفيرك زعفران
يطرح امان
لو ينفرد
حا يكون انيس ويكون ونس
والنور معاكى تفرقيه
فوق المصاطب
عقد لولى بينفرط وبينبدر
ان كان يصيبنى ف يوم ضرر
تتنهدى تتمددى تتكرمشى
وبغيظ كفوفك تنكشى
شعرك غضب
ينزل خيالك م السما
ع البحريفرد عزتك
ينزل خيالك
نار ع الجبل
فايدل كل الحيرانين
اللى ف سفر واللى انقهر
من ليل طويل
يسال على طعم الضحى
ينزل خيالك م السما
لا الخوف يغير ملته
ولا صعب يلوى نيته
ولا يشتكى ولا يعتذر
وبرغم دورك ف الفضا
مالهوش خيار
كنت ارصدك
كوكب على درجة قمر
لكن بصيرتى لما زاغت والبصر
شفتك ف صورتك محزنه
ممسوخه ف الصوره حجر
جوه السحابه المعتمه
يمنعها تحبل بالمطر
فازاى قبلتى بدون بصيره
بدون بصر
تنشقى وتسيبى المدار
فاتبان علامات القيامه
لا توبه تنفع او حذر
الشاعر مغاورى كروش
ليست هناك تعليقات:
إرسال تعليق