اوعوا تقولوا إن أنا فشارة
ثورة صراصير جوه البلاعة
حبة شياطين عمللها إذاعة
بياع جوال على كتفه بضاعة
مولود بسنان محتاج سيجارة
اوعوا تقولوا إن أنا فشارة
فقير غلبان في ايده سيجار
مشوي و مقلي قدامه انهار
فعل و فاعل في الأصل حمار
نقطة على السطر ملهاش قطع غيار
اوعوا تقولوا إن أنا فشارة
أرجوز أتجوز أرجوزة
رقصت في فرحتهم لوزة
عملوا الحنة عند ألحاتي
عيش حاف غمس على الريحة ليلاتي
كم متسول على شحات
و اوعوا تقولوا إن أنا فشارة
الأسطورة جوه الحارة
حكم الكرسي بكل شطارة
أرنب حافي هربان من الجيش
أخر الصف بيشتري عيش
ملك الغابة و صاحبه التيس
اوعوا تقولوا إن أنا فشارة
ضحك الفار على صاحبه التعلب
زعل الفيل و قال مش ح العب
بيكيا الناس جوه الدواليب
شعب جعان و هرم توابيت
ليل و نهار سارحه العفاريت
اوعوا تقولوا إن أنا فشارة
برغوت جعان في حضن فقير
دبور سعران يقرص و يطير
العم سام فزاعة في الغيط
جنب الدولار جنيه عبيط
يا عم روح دا سعادة البيه
و بابا أوبح بس اوبح ليه؟!
اوعوا تقولوا إن أنا فشارة
** منى غنيم **
10 / 2 / 2018
ليست هناك تعليقات:
إرسال تعليق