في حضن القمر شعر باللغة العامية المصرية
غنائية
××××××××××××××
عايش بأقول أنا عايش
أتاريني من كتر همومي مش عايش
أمشي أقابل كل الناس ألاقي في العيون لمعة بدمعة
لفرحة ما بتتقاس
أمشي بتعب في دربي وحدي
يفارقني شعوري والإحساس
كلي وجع قلبي رجع
تاني ليشرب من نفس الكاس
حرام حبيبي تفوتني حرام تسيبني
بين أسايا والغرام
يذبحني بعادك في الحقيقة وف الأحلام
تقضي عليا تنهيدة أو الآلام
ماشي وشايل شدتي صابر على الأيام
لا عاد لي في قلبك حبيبي وطن
ولا عادت الأيام بتوقف زمن
لسه فاكرك يا حبيبي مش ناسيك
لساته قلبي يا حبيبي بيناديك
بأتمنى لنظرة منك واقف ومستنيك
وبنفس المكان أحن ملهوف عليك
تعود وترجع ذكرى ومنبع حياته فيك
ساعة فراق بات العذاب فيا و فيك
أنام وأسرح كمان وكمان يهرب أمان يزيد شجن
ومن الفراق يبعد حنان يضيق مكان حبي اتسجن
بالظنون مع أحلى عيون تتأسر
في بحرك إنت ما له قرار بس اصطبر
على جراح ضد التيار قلبه استمر
من الأشواق طول النهار ذاق الأمر
كونك بعيد تبقى غريب طال السفر
والبعيد يبات يرجع سعيد في حضن القمر
شعر / ياسر عوض السيد
ليست هناك تعليقات:
إرسال تعليق