صباح الخير .. كلمة و قالتها
خلص العسل ... من بيتها
فراحت عند الجيران تملى جرتها
و بصوت نعسان ندهت على خالتها
طلع زينة الشباب .. و طلعت معاه
ضحكتها ..
يدوب بس فتح الباب .. فتحت هي
ألف كتاب لحكايتها ..
العينين فيهم كلمتين قدام ..
لو عندك ذمة يا جدع كنت ضمتها ..
و الحيط اللي مفرقكم بإيديك
كنت هديتها ..
رد بطرف عينه .. متجبرة
متكبرة .. ما لي طاقة على
غيرتها ..
رفعت راسها لفوق .. و قالت
متنساش روحي دي أنت اللي
ربيتها ..
و ما بين لوم و عتاب
ما خلصش الكلام ..
بس اتملت بالعسل جرتها
سألوها البنات
عن زينة الشباب
و ليه عالية ضحكتها ..
غمزت بعينها
و قالت ..
أصل العسل .. من النهاردة
هايقف تحت شبابيكها ..
عروس النيل / العنود
ليست هناك تعليقات:
إرسال تعليق