قصيده سبق نشرها فى ابريل 2016م واليوم اعيد نشرها بعد اجراء تعديلات طفيفه
معنى الحب
كلمة بحبك كتير من الناس لبعضها بتقولها
لكن حقيقى بعضهم مابيعرفوا معناها واصولها
الحب كلمه حلوه ولطيفه تحب من كل الناس تسمعها
الحب درجات تعالو مع بعضنا نعرفها ونفهمها
يعنى لو واحده قالتلك بحبك لازم عن الحب تسالها
اوعى تتسرع وعلى الكلام تجاوبها
بموت فيكى وبكدا أنت بتحرجها
هى حبت فيك صفه جميله وعبرت عن شعورها
مش كل اللى يقولك او تقولك بحبك يبقى عشقتك وعاوز دلالها
الحب انواع تعالوا مع بعضنا نشوفها ونوصفها
ولما اقولك بحبك لازم تعرف الكلمه وسببها
فيه حب إهتمام بكل والناس ومصالحها
وفيه حب لروح حلوه ظريفه جميله فى تعاملها
وفيه حب لبنتى واختى وعمتى وخالتى واللى أنا خالها
فيه حب إعجاب لشاعر عشان قصايد حلوه بيكتبها
وفيه حب إعجاب لفنان عشان أدوار حلو بيقدمها
وفيه حب إعجاب لاغانى بتحرك الوجدان ومشاعرها
وفيه حب إعجاب لمعلومات وثقافه تحب تقرأها وتنشرها
وفيه حب إعجاب لنصيحة إبتغاء مرضاة الله بتقولها
وفيه حب تعاطف لواحد او لواحده ماتحب تخسرها
وفيه حب إنى ارتاح معاك فى كلمات تعرف تترجمها
وفيه حب لله هو احسن انواع الحب وافضلها
وفيه حب لذات الدين بيعجبك فى الانثى اخلاقها ودينها
يعنى كلمة احبك لما تقولها لازم تعرف تفسيرها
ومش لكل الناس تقولها فيه ناس كتير ماتفهمها
مش كل كلمة احبك معناها حب وعشق ؟ وتغازلها
قلب المرأة لرجل واحد هو من ملك القلب وصار اسيرها
وحب الرجل لإمرأة واحده دخلت قلبه ومايقدر يخرجها
ومش كل واحده شافت فيك حاجه حلوه يبقى بتعرض جمالها
وترد عليها بسرعه وبكلمات الحب والعشق تغرقها
الحب كلمه كبيره وجميله فى الارض والسماء جذورها وفروعها
بالحب تحيا البشرية فى أمان وسلام لكل احوالها
حب لاخيك ماتحب لنفسك تكن مسلما رسولنا الكريم قالها
بقلمى / حسانين خاطر ( صادق الوعد )
20/4/2016م معدله فى 3/8/2017م
ليست هناك تعليقات:
إرسال تعليق