دويتو الأدباتى
أنا الأديب الأدباتى
بجري علي رزقي يوماتي
وبأسن سنانى..ونباتى
ع اللى يسرق أوطانى
واللى سقانى برانى
واللى رمانى ف أحزانى
أتقلب..وحده ف أناتى
.......................................
أنا الأديب...الأدباتى
أنا الأديب المتفنط
ماسك لجامى ومزبط
نشان كلامى ومخطط
جوه خيالى..بأتنطط
بالمازورة...تخطيطى
وأنا الأديب..الأُدباتى
...................................
أنا الأديب اللى ما فلس
ما دام ..رغيفى متغمس
بفول حراتى ومدمس
تغطى الدنيا ضحكاتى
وأنا الأديب.. الأُدباتى
.....................................
أنا الأديب المتأدب
بفن فنى..وبرتب
أى منعكش ومكركب
لا موجه تركب على مركب
ولا جهلى يكسر إشراتى
وأنا الأديب.. الأُدباتى
.....................................
انا اديب وحالتي ماشيه
باكلت فول وطعميه
ولابس بدله مهريه
وبرمي نص المهيه
في كل شهر على التدخين
وأنا الأديب.. الأُدباتى
.................................
ستين سجارة يوماتي
دي مش سجاره دى اذيه
لناس واكبر حرميه
تفضل في جيبي يا محترمين
وأنا الأديب.. الأُدباتى
.....................................
بقالي يمكن ستين عام
احسب معاي شربت بكام
تمن عماره والله تمام
واسألني يا ابني فين ساكنين
وأنا الأديب.. الأُدباتى
.....................................
ساكن في شقه ارضيه
محرومه من النور والميه
فيها الفران رايحة وجيه
عشان رخيصه وانا مسكين
وأنا الأديب.. الأُدباتى
.....................................
انا من النهرده الصبحيه
هبطلها واكفايه اذيه
واعيش بصحه هنيه
لاولادي في حياتي الجايه
هبطلها وخليكو شاهدين
و أنا الأديب ..الأدباتى
....................................
تحياتي / خالدالمنصوري
ليست هناك تعليقات:
إرسال تعليق