المريلة لسه كحلي
أيوه .. لسه المريلة كحلي
بس المرة دي وآخده أشعاري
في حضني
سبت كتبي .. أصل الحياة
أكبر مدرسة .. مش محتاجه
فيها .. لا كراسة ولا علبة
هندسة ..
بذاكر لوحدي .. لاعمي
شرح لي .. ولا خالي
حكالي .. و كمان مالقتش
حد يغششني ..
خدت المواجع درس .. درس
و الحزن حفظته .. بالنص
ما شاء الله عليا طالعه
الأولى في الخيبة الأوية
بس الحمد لله .. خلصت
بدري رصيدي ..
من الأحزان .. و استلفت
كمان .. قرضين تمام
كده يا دنيا .. حق وصل
بالتمام .. و الكمال ..
تعالى بقى يا حلوة
هاتي اللي عليكي
دانا .. ياما سلفتك زمان
معلش يا ختي كل واحد
أولى بحقه ..
شوفي خدتي مني كام
سنة .. ترجعيهم مليانين
هنا ..
و خدي بالك .. أنا المرة
دي مش هاتنازل عن
حقي ..
و لا هاعيد السنة .. و ده
آخر كلام عندي .. و عجبي
عروس النيل / العنود محمد
معنى المريلة : زي المدرسة للبنات
مشهور عندنا في مصر
ليست هناك تعليقات:
إرسال تعليق